呢間位於 Sierra Sea 嘅 339 呎兩房單位，主人鍾意奶油色嘅溫柔、木系嘅自然，想要空間簡潔，但又唔想犧牲實用。佢好清楚自己嘅習慣，每一個細節都係為咗住得更順手。

我哋將全屋櫃體做上頂，既增加收納，又保持視覺連貫；弧形轉角柔化空間線條，同時留返窗邊嘅景觀，唔會因為做櫃而擋住珍貴嘅視野。

由玄關到睡房，每一個角落都按佢嘅生活習慣規劃——將美感同實用結合，做一個真正貼近日常嘅家。

🚪 玄關｜一入門就係實用
門口做咗一個有弧度嘅換鞋位置，方便出入。全屋櫃體做上頂，收納充足之餘，視覺上亦連貫統一。

📺 客廳｜拉出式電視，收線收得靚
電視機櫃採用拉出式設計，所有電線收晒入櫃，要開關電源嘅時候輕輕一拉就得，枱面永遠乾淨企理。窗邊設計盡量保持通透，最大化保留窗外景色。

🍽️ 餐枱｜平時收起，要用先拉出嚟
摺叠式餐枱配合摺凳，平時收起唔阻地方，要用嘅時候先拎出嚟，靈活又實用。摺凳收喺餐邊櫃入面，空間保持整齊。

🪞 主人房｜活動式梳妝台，唔阻動線
預留位置擺放梳妝台，唔會阻住日後出入露台，需要嘅時候拉走，唔用就還原，空間保持方便。

🛏️ 床頭｜軟包加小坑位，舒適又實用
床頭軟包配合小坑位，可以放置眼鏡等小雜物，細節藏住生活嘅體貼。

📚 書房｜升降枱，靈活調節
升降枱可以靈活調整高度，改善工作環境嘅舒適度同靈活性，配合唔同需要。

🧺 高櫃｜整齊收納
高櫃提供更多收納空間，整齊之餘仲預留專為放球袋而設嘅位置，將每寸空間用到盡。